4

من الآخر وبالعامية كمان

نص مواطنة

هداية شمعون

هذا أنا يا جماعة نص مواطنة لأني لما بأتأخر بدفع فاتورة الكهربا بألاقيهم قاطعين عني الكهربا، ولما اخذنا ترخيص لبيتنا في حي الجنينة تمرمرنا ودفعنا لما نشف ريقنا لكن قلنا حقهم، إحنا بنسمع الكلام دائما.. ولما صار حسينا حالنا انتهكت حقوقنا وبطلنا ننام ولا نصحى ولا ندرس ولا نشتغل ولا نهتم ببيوتنا ومشاغلنا قلنا لا يا جماعة بدهاش !!!

لقينا كل الجيران مصدومين ومقهورين وبيكلموا حالهم ليل نهار، اللي عنده توجيهي واللي عنده هندسة بالجامعة واللي عنده اعدادي وابتدائي ووو قبعت معنا وفي عدة تفاوضات مع صحاب المشروع من بعض الجيران يعني شوي بدنا نترجاه يقلل الساعات لكن قلنا ببلادة لا شوفوا.. برمضان ولا تفكروا تحكوا معي!!! برمضان للسحور يا ما شاء الله!! يخزي العين أبوك الوزير ولة مين..!!

طيب اتفقنا والجيران نمشى بكل ما يضمن حقوقنا وبصوت واحد لأن همنا واحد.. وبدي اتجاهل محاولات صاحب المشروع ليدعي أمور كثيرة بين الجيران ويشعر كل واحد انه هو بس المعارض (فرق تسد يعني)!!

المهم عملنا عريضة بنهاية شهر مارس 2014 ووقع عليها 15 عائلة وحاولنا نقدمها لكن الخلاصة وعلشان ما افوتكم بتفاصيل بدها تحقيقات صحافية أساسا ..يوم 2 أبريل استلم رئيس بلدية رفح الشكوى باليد ولحتى اللحظة لا حس ولا خبر !!!!

اللي بدي أقوله انه احنا طول الفترة كل عيلة بالعافية بتمسك أعصابها لأن لا في أي أدب أو أخلاق أو رياضة بالموضوع، المسألة مشروع تجاري فتح في نفوخنا الساعة بـ50 شيكل ومش متحمل صاحب المشروع فكرة انه يعني بده يخسر!! مش عارف انه خسرنا حياتنا كلها واستقرارنا وراحة بالنا وخسرنا ووقت وجهد وأعطانا ارق وارهاق و القائمة تطول هو مش عارف اني بدي ارفع عليه أصلا قضية بضرر نفسي واجتماعي واقتصادي !!

مابدي احكي عن الشباب بالملعب لأنه بطل في حكي هو مش موفر ولا دورة مياة (حمام) بالعربي الفصيح !!! ولا غرفة غيار للي بيلعبوا وبالتالي البلاطين ع الأرض واللي بيسحل شرطة عادي واللي بيرمي حالة وبيقهقه !!!! ولما شكى واحد من السكان انه الشباب ع قبال باب بيتهم والبنات بيضايقوا وهم طالعين او راجعين كان رده ..خليهن يستر حالهن !!! شو رأيك نستنى لحد ما تقلنا بنات المنطقة بيبصبصن ع الشباب !! مهو انا بعد شوي بدي احكي هندي!!

ومع اني برضه ما باحكي ع الشباب هدول الشباب ع مدار 7 سنين في حياتي ما شفتهم او باعرفهم وما جابهم ع المنطقة تحت شبابيك بيوتنا إلا انشاء ملعب غير مرخص تجاري وبالتالي باعتبر الشباب ضحايا عدم توفير البلدية والوزارات الخاصة بالشباب أماكن تليق بهم وتحترم كرامتهم، وكمان مش مجبرين احنا كسكان ومواطنين نكون الضحايا لأنه مش احنا اللي مجبورين نحل أزمة البلد انا مواطنين مش مسؤولين في فرق كبير!!

ارجع لقصة المواطن اكتشفت اني نص مواطنة لأنه البلدية تجاهلتني تماما وكل جيراني الـ15 عيلة بدي اقلهم اليوم انتو كمان زيي نص مواطنين لأنه ما حد معبرنا من المسؤولين رغم انه ما تركنا باب الا طرقنا !! وصاحب الملعب التجاري أبو الخمسين شيكل هو اللي بيتمتع بصفة مواطن مع انه ما رخص من البلدية وما عمل تخطيط لموقع الملعب من الأقسام الخاصة بالبلدية وما عمل اذن ولا ع باله كل البلدية واشتغل شهرين كاملات واحنا بنركض وبنولول للمسؤولين والكل يقول قصتوا سهلة وبسيطة مش قانوني!! طيب هو انا يعني مش قانوني وانا كل يوم الصراخ والملعب شغال وبراسنا .. شو مفهوم انه حتى الشرطة لما قدمت شكوى باسمي نيابة عن الجيران كلهم ماكان بدها تقبل الشكوى بتقلي قضيتك عند المستشار القانوني بالبلدية !! ورغم هيك جبنا موافقة النيابة العامة وقدمنا شكوى للشرطة بتاريخ 16 أبريل 2014

صاحب المشروع مواطن صالح وعامل كل اللي عليه وزيادة ما بأعرف مين اله واسطة لأن الموضوع صار واضح تماما كيف بيجرؤ ع هالتحدي السافر لكل اللي احنا بنعانيه ومافي حد قابل يسمع منا..

همسة أخيرة بطلت عارفة بجد هل قرأ رئيس البلدية شكوانا هل اطلع أعضاء المجلس البلدي شكوانا ومشكلتنا؟ هل يجب أن أنتظر كمان قديش لأعرف رد المستشار القانوني في بلدية رفح ع القضية !! كل القانونين اللي تواصلت معهم اكدوا ان المعلب مخالف للقانون ولا يجوز في منطقة سكنية الموافقة ع انشاء ملعب تجاري والا صارت هاي قضية تانية مصيبة تانية!!

!!

أنا صرت خايفة أكون بكل السياق السابق ما أطلع نص مواطنة وأكون أقل من هيك بكثير..!! أو نعيد تأصيل المفاهيم مرة تانية

كروكي

إرسال تعليق Blogger

 
Top